[prenta uppsett í dálka] 71. fundur, 127. lþ.
Lúðvík Bergvinsson:
Virðulegi forseti. Það hefur komið skýrt fram í þessari umræðu að hér var farið eftir lögum í alla staði. Það er þannig, hv. þm. Vilhjálmur Egilsson, það er þannig og það er ástæðan fyrir því að menn þurfa að krefjast dómsúrskurðar því þegar menn gera húsleit eru þeir að brjóta friðhelgi einstaklinga. Þess vegna þarf að fá dómsúrskurð. Það er einfaldlega þannig. Annars þyrfti ekki þennan dómsúrskurð. Þessi úrskurður var kveðinn upp og leitin fór fram eftir þeim lögum sem um það gilda, lögum um meðferð opinberra mála. Það er nákvæmlega þannig í þessu máli að nákvæmlega var farið eftir þeim reglum sem um þetta gilda. Ef menn eru ósáttir þá er ekki enn búið að breyta réttarríkinu meira en svo að þeir geta þó a.m.k. borið það undir dómstóla. Menn geta borið haldlagningu á þessum gögnum undir dómstóla.
Virðulegi forseti. Ég verð að segja að ég hef aldrei vitað til þess að í húsleitum þegar verið er að leita að tilteknum gögnum viti yfirvöld nákvæmlega í hvaða skúffu þau eru. (Gripið fram í: Verðsamráð, hérna.) Það getur bara vel verið að það þurfi að fara yfir ýmislegt í tilviki eins og þessu að þarna liggur fyrir grunur um verðsamráð. (Gripið fram í: Mappa merkt: Verðsamráð.) Það er lítið annað að gera en fara í tölvugögn. Það er kannski ólíklegt að á borðum manna sé mappa merkt: Verðsamráð. Það held ég að sé heldur ólíklegt þannig að þetta er vitaskuld algerlega fráleitt.
Virðulegi forseti. Því miður held ég að hér búi annað og meira undir því að í ljósi þess bréfs sem kom frá Samtökum atvinnulífsins og þess sem hér er á ferðinni, virðist mér að fyrirhugað sé að reyna að gera nokkurs konar aðför að samkeppnislögum. Ég held að ekkert annað liggi hér undir því allir sjá í hendi sér hversu fráleitur málflutningur þetta er í alla staði. Ekki stendur steinn yfir steini. Það eitt að ætlast til þess að viðskrh. gangi fram fyrir skjöldu, taki fram fyrir hendurnar á dómstólum, taki fram fyrir hendurnar á lögreglu og það að mér virðist eiginlega allt ... (Forseti hringir.) það meira að segja undirbúið, segir manni að menn meina ekkert með þessu. Þetta er fyrst og fremst einhvers konar áróðursaðferð.
