Iðnaðarráðherra (Valgerður Sverrisdóttir):
Hæstv. forseti. Ég á svolítið erfitt með að átta mig á vandamálinu. Ég tel það ekki gagnrýnisvert þó að alþjóð fái að sjá þær tillögur sem ríkisstjórnin vill leggja fram í byggðamálum. Það að þær voru kynntar í Ráðherrabústaðnum finnst mér ekki vera ástæða til umræðu utan dagskrár á Alþingi. Ég undrast það ef hv. þm. ætlar að gera þetta að aðalatriðinu ... (SJS: Hvað er það?) Hæstv. forseti. Er það orðið regla að kallað sé fram í af fremsta bekk?
(Forseti (HBl): Það hefur færst í vöxt.)
Það sem ég tel aðalatriðið --- ég held að við séum alveg sammála um það, ég og hv. þm. --- er að hér fari fram málefnaleg umræða á Alþingi um byggðamál þegar þessi þáltill. kemur fram og verður sett á dagskrá. En hún er ekki á dagskrá í dag. Þó að hér verði rædd skýrsla Byggðastofnunar í dag vil ég vara hv. þm. strax við og segja: Það verður ekki umræða um hina nýju till. til þál. um byggðamál vegna þess að hún er ekki á dagskrá.