[prenta uppsett í dálka] 74. fundur, 127. lþ.
Jóhann Ársælsson (andsvar):
Hæstv. forseti. Ég leyfi mér að efast um að þetta sé svona. Ég hef fylgst með hvernig svona mál eru unnin. Satt að segja bæði efast ég um að þetta sé rétt og vona líka að þetta sé rangt, einfaldlega vegna þess að núna vinnur betur menntað fólk við þessa hluti en áður. Ég veit um þann metnað sem þessir bankar, a.m.k. stærri lánastofnanir, hafa á undanförnum árum sýnt til að hafa á að skipa fólki sem hefur þekkinguna til að fylgjast með í atvinnulífinu.
Bankarnir lentu í miklu tapi áður vegna þess að því hafði ekki verið sinnt nógu vel að fara yfir þessa hluti, athuga framtíðarmöguleika fyrirtækja og hvort of miklir peningar væru lánaðir í þessi fyrirtæki. Menn ætla ekki að lenda í þessu aftur og þess vegna hefur verið lögð mikil áhersla á að til þess menntað fólk fylgist með atvinnulífinu.
