Ögmundur Jónasson (andsvar):
Herra forseti. Ég er andvígur því að við látum 80% af þeirri orku sem við framleiðum fara til stóriðju. Ég er andvígur því. Að öðru leyti vil ég segja að við eigum ekki að ræða þessi mál í viðtengingarhætti eða þáskildagatíð. Við stöndum frammi fyrir mjög afdrifaríkum ákvörðunum varðandi virkjanir og stóriðju á Austurlandi. Það er ekki rétt sem fram kom í máli hv. þm. Arnbjargar Sveinsdóttur, þ.e. að við höfum farið rækilega yfir hinar þjóðhagslegu forsendur. Við höfum ekki gert það. Við höfum margoft óskað eftir því, þingmenn Vinstri hreyfingarinnar -- græns framboðs, að það verði gert, að málin verði brotin til mergjar.
Ég vísaði í röksemdir hagfræðinga sem birst hafa í blöðum og tímaritum að undaförnu. Ég innti hv. þingmenn, þar á meðal hv. þm. Arnbjörgu Sveinsdóttur, eftir því hvort þeir hefðu kynnt sér tilteknar greinar, (ArnbS: Búin að því.) t.d. í Vísbendingu fyrir fáeinum vikum. Þá kom fram að hún hafði ekki gert það. Að sjálfsögðu er það grundvallaratriði að alþingismenn kynni sér rök með og á móti í hverju máli, ekki síst í eins afdrifaríku máli og hér um ræðir.