Margrét Frímannsdóttir:
Virðulegi forseti. Ég þakka hv. þm. Steingrími J. Sigfússyni fyrir að taka þetta upp. Þetta er vissulega þörf umræða og þyrfti lengri tíma en þessar örfáu mínútur sem gefast í fyrirspurnatíma enda hefur staða sveitarfélaganna versnað til muna. Þau hafa verið að bregðast við þeirri fólksfækkun sem blasir við á mjög mörgum svæðum og síðan hafa verið lagðar á þau mjög ríkar lagalegar og skuldbindandi skyldur sem hafa fylgt EES-samningnum.
Ég vildi beina þeirri spurningu til hæstv. ráðherra hvort vitað sé hver staðan er gagnvart húsaleigubótunum, greiðslum inn í jöfnunarsjóðinn, hvort þær standi undir skuldbindingum vegna húsaleigubótanna og ef ekki, hvort þá eigi að bregðast við með einhverjum hætti.