![](http://www.althingi.is/myndir/althlit.gif)
Frsm. meiri hluta iðnn. (Hjálmar Árnason) (andsvar):
Herra forseti. Ég get um margt tekið undir það sem fram kom í ræðu hv. ræðumanns, Einars Más Sigurðarsonar.
En mig langar til að beina til hans einni spurningu. Hann reifaði ágætlega hvernig samsetning starfa vegna álverksmiðju gæti orðið á Austurlandi. Nú kom fram í ræðu við upphaf þessarar löngu umræðu, frá öðrum þingmanni Austfirðinga, hv. þm. Þuríði Backman, að ein röksemd hennar fyrir andstöðu við álversframkvæmdir á Austurlandi væri m.a. sú að ekki sé nægjanlegur mannskapur til staðar til að sinna öllum þeim mörgu störfum sem yrðu til við uppbyggingu álversstarfsemi á Austfjörðum.
Mig langar til að heyra hv. þm. Einar Má Sigurðarson bregðast einnig við þessu, þar sem hann er þingmaður Austurlands eins og hv. þm. Þuríður Backman.