Ögmundur Jónasson (andsvar):
Herra forseti. Hv. þm. Guðmundur Árni Stefánsson beindi nokkrum spurningum eða öllu heldur ásökunum til mín og í garð Vinstri hreyfingarinnar -- græns framboðs. Það eru ekki tök á að svara þeim öllum í stuttu andsvari þannig að ég óska eftir að verða settur á mælendaskrá með seinni ræðu mína við 2. umr. málsins.
Það er alveg rétt hjá hv. þm. að við teljum fyrirhugaðar framkvæmdir við Kárahnjúka og 420 þúsund tonna álver í Reyðarfirði ekki réttlætanlegar framkvæmdir á umhverfisforsendum. Þær munu valda óafturkræfum náttúruspjöllum sem við getum ekki samþykkt. Hins vegar hafa þessar ráðstafanir verið réttlættar í ljósi meints efnahagslegs ávinnings. Þennan meinta efnahagslega ávinning og áhrif sem þessar ráðstafanir mundu hafa á íslenskt efnahagslíf viljum við ræða.
Ég fór mjög rækilega yfir það í ræðu minni í dag hverja ég tel áhættuna fyrir innlenda fjárfesta vera, þar á meðal lífeyrissjóðina. Ég fór rækilega yfir þá áhættu sem ég tel í þessu fólgna fyrir eigendur Landsvirkjunar, ríkið, Reykjavíkurborg og Akureyrarbæ, þar með alla íslensku þjóðina sem stendur þarna að baki. Ég fór rækilega í saumana á efnahagslegum áhrifum þessara framkvæmda. Ég fór efnislega yfir þetta og ég sakna þess svolítið að hv. þm., sem lýsti sjálfum sér sem raunsæisþingmanni, sýndi okkur fram á í hverju raunsæi hans er fólgið. Ég saknaði þess að hann færi nánar í efnisleg rök sem fram hafa komið í þessu máli. Það eru þau og sú umræða sem við höfum auglýst eftir.