Frsm. iðnn. (Hjálmar Árnason):
Herra forseti. Ég mæli fyrir nál. um frv. til laga um breytingu á lögum nr. 17/1991, um einkaleyfi, með síðari breytingum. Það er álit iðnn.
Nefndin hefur fjallað um málið og fengið til sín gesti og margar umsagnir. Hér er í rauninni um mjög einfalt frv. að ræða. Það er lagt fram í því skyni að laga lög um einkaleyfi að breytingum á samstarfssáttmálanum um einkaleyfi og koma á því fyrirkomulagi að umboðsmenn einkaleyfishafa þurfi ekki að vera búsettir hér á landi, en það skilyrði núgildandi laga stríðir gegn meginmarkmiðum samningsins um Evrópska efnahagssvæðið um frjálst flæði þjónustu.
Í sjálfu sér er ekki mikið meira um þetta að segja. Þetta kemur skýrt fram á nál. á þskj. 1074. Nefndin gerir þó tillögu um smávægilegar breytingar sem jafnframt er gerð grein fyrir á þskj. 1075.
Nefndin mælir með því að frv. verði samþykkt með þeim breytingum sem er að finna á þskj. 1075. Undir nál. rita allir þeir sem sátu fundinn í hv. iðnn.