![](http://www.althingi.is/myndir/althlit.gif)
Steingrímur J. Sigfússon:
Herra forseti. Hæstv. félmrh. upplýsti við 1. umr. þessa máls að ástæða þess að ekki var hægt að taka inn í stjfrv. ákvæði um rafræna kosningu og rafræna kjörskrá væri andstaða Sjálfstfl. Með leyfi, sagði hæstv. ráðherra í ræðu sinni:
,,Sjálfstfl. ályktaði á landsfundi sínum einhverra hluta vegna gegn rafrænum kosningum og þess vegna eru ekki rafrænar kosningar inni í frv. vegna þess að Sjálfstfl. hefur það á prógrammi sínu að vera á móti rafrænum kosningum. Ég er hins vegar nokkuð undrandi á þeirri afstöðu,`` --- sagði hæstv. félmrh. Það er ég einnig. Ég tel alveg sjálfsagt að samþykkja þessa tillögu. Og það er merkilegt að hér skuli koma upp fulltrúi forneskjunnar og vera á móti því að hagnýta nýjustu tækni, rafræna tækni í þessum efnum. Sami maður hefur þá væntanlega líka verið á móti krítarkortum á sínum tíma en það var ég ekki eins og kunnugt er.