![](http://www.althingi.is/myndir/althlit.gif)
Frsm. iðnn. (Hjálmar Árnason):
Herra forseti. Ég mæli fyrir nál. iðnn. um frv. til laga um breytingu á lögum nr. 8/1996, um löggildingu nokkurra starfsheita sérfræðinga í tækni- og hönnunargreinum, með síðari breytingum.
Nefndin fékk að venju til sín gesti og umsagnir, hlýddi á og skoðaði nokkuð rækilega.
Frv. byggist á tilskipun nr. 19 frá Evrópusambandinu frá árinu 2001 og lýtur að viðurkenningu á starfsréttindum ýmissa starfsstétta í tækni- og hönnunargreinum.
Nefndin mælir einróma með því að frv. verði samþykkt en gerir þó eina breytingu. Hún leggur til að raffræðingar bætist við upptalninguna á löggiltum starfsheitum í tækni- og hönnunargreinum, en með því er um að ræða staðfestingu á þeim réttindum sem rafvirkjar hafa aflað sér með meistaranámi sem veitir rétt til A- eða B-löggildingar.
Hv. þm. Pétur H. Blöndal hefur fyrirvara á nefndarálitinu og sá fyrirvari byggir á því sem síðast var nefnt, þ.e. að hv. þm. styður ekki þessa viðbót varðandi raffræðinga. Að öðru leyti er iðnn. einróma sammála þessu áliti.