Sigríður Ingvarsdóttir (andsvar):
Hæstv. forseti. Fram kemur í máli hv. þm. Jóhanns Ársælssonar að ég hafi fullyrt að þarna væri um skipulagða aðför að ræða. Nánar tiltekið sagði ég: ,,Ekki finnst mér þó ólíklegt að þarna sé um skipulagða aðför ... að ræða.`` Ég er ekki að fullyrða eitt eða neitt. En það er alveg rétt sem hv. þm. segir að þetta er ekkert sem á að koma okkur á óvart og það gerir það heldur ekki. Ég sagði: Við vitum að hér er stundað brottkast. Við vitum það. Það er staðreynd og það er enginn að mótmæla því.
Ég sagði einnig að ýmsar leiðir væru til að hagræða í útgerð og hv. þm. á að vita hvaða leiðir það eru. Útgerðarmenn geta keypt, þeir geta selt og þeir geta skipt á jöfnum veiðiheimildum og það er engin afsökun fyrir því að henda afla í sjóinn. Ég neita að taka slíkum rökum.