[prenta uppsett í dálka] 33. fundur, 127. lþ.
Drífa Hjartardóttir:
Herra forseti. Ég vil meina að þessi skýrsla um menningartengda ferðaþjónustu sé afar vönduð og merkileg í sjálfu sér, þó að hún taki ekki á hverju smáatriði á hverjum stað fyrir sig á landinu, enda var það ekki tilgangur skýrslunnar.
Ég held að menningartengd ferðaþjónusta sé okkur afar mikilvæg og það hefur sýnt sig að gríðarlega margt skemmtilegt hefur verið gert hér á landi, þar sem fólk nýtir sér þau tækifæri sem því eru nærtækust, söguna, þessa menningarlegu arfleifð sem við eigum. Inn í þetta kemur t.d. verndun gamalla húsa, tónlist, allt sem við getum sagt að tilheyri sögu okkar og ég vil þá sérstaklega minnast á hvað Rangæingar hafa gert varðandi Njálu og Njálusafnið. Eðlilegast væri að taka Sturlungu næst og gera henni hátt undir höfði.
