Forseti (Halldór Blöndal):
Ég vil af þessu gefna tilefni taka fram að ég hef ekki óskað eftir því að einstakir þingmenn skýri mér frá því um hvað þeir ætla að tala hér í ræðustól þegar þeir kveðja sér hljóðs um störf þingsins. Hv. þingmönnum er alveg frjálst að láta slíkar upplýsingar í té en það hefur engin áhrif á stjórn mína, nema ef hv. þingmenn óska eftir því að taka ekki til máls.
Í öðru lagi vil ég taka fram, eins og ég sagði áður, að þingsköp eru mjög skýr varðandi þá trúnaðarskyldu sem hvílir á utanrmn. og sambærileg ákvæði eru ekki um aðrar þingnefndir. (SJS: Það er alger þvæla að gagnálykta svona.) Ég skil nú ekki í hv. 3. þm. Norðurl. e. að tala um að þetta sé þvæla. Þetta eru skýr ákvæði í þingsköpum. (Gripið fram í.) Ég vil biðja hv. 3. þm. Norðurl. e. að róa skap sitt.