![](http://www.althingi.is/myndir/althlit.gif)
Ásta R. Jóhannesdóttir (andsvar):
Herra forseti. Þetta svar var algjörlega út í hött. Ég var ekki að tala um komugjöld á heilsugæslustöðvar. Ég var að tala um greiðslur fyrir ferliverk. Þau voru ekki hærri fyrir sjúklinginn en 6.000 kr. og eru það ekki enn þá. En með þessu frv. ríkisstjórnarinnar á að taka það hámark af þannig að það getur farið upp í yfir 18 þús. kr. þangað til afsláttarkortið fer að virka. Þannig getur ein koma til sérfræðilæknis farið yfir 18 þús. kr. og síðan borgar sjúklingurinn 1/3 af gjaldinu eftir það, eftir að hann er kominn með afsláttarkortið.
Ég minni á að hvert afsláttarkort fellur úr gildi um áramót og þá þurfa menn að safna sér aftur upp í afsláttarkort ef þeir þurfa mikið að sækja til læknis þannig að þarna er verið að auka verulega álögur á sjúklinga með þessari breytingu og, eins og ég sagði, verið er að hækka gjöldin fyrir sérfræðilæknisþjónustuna og ferliverkin um 200--300% í vissum tilvikum. Er það þetta sem flokkurinn vildi með fólk í fyrirrúmi?