Kristinn H. Gunnarsson (andsvar):
Herra forseti. Ég kem hingað til að gera athugasemdir við þau ummæli þingmannsins sem lutu að Byggðastofnun. Málið er mér skylt þar sem ég sit í stjórn stofnunarinnar, og ummæli hv. þm. um styrki Byggðastofnunar til eignarhaldsfélaga og hvernig framlag heimamanna væri metið voru rangar fullyrðingar að mínu mati og ég vísa þeim algerlega á bug fyrir hönd stofnunarinnar.
Ég vil benda hv. þm. á að stofnuninni ber að setja fé til eignarhaldsfélaga samkvæmt lögum og hefur gert það þar sem heimamenn hafa verið tilbúnir að leggja fram framlag á móti en samkvæmt reglugerð má stofnunin ekki eiga meira en 40% í þeim félögum og því er ekki hægt að láta út fé nema 60% fjár komi á móti heiman úr héraði. Það er auðvitað það sem skiptir máli og það er ekki hægt að fallast á það sem meginreglu að stofnunin kaupi fé í eignarhaldsfélögum án þess að mótframlag komi til.