![](http://www.althingi.is/myndir/althlit.gif)
Steingrímur J. Sigfússon (andsvar):
Herra forseti. Samkvæmt því fjáraukalagafrv. sem við vorum að enda við að afgreiða í vikunni er það þannig að ef áætlaðar tekjur af sölu eigna sem enn hefur að vísu ekki farið fram --- kannski er hún í vændum eins og hæstv. forsrh. upplýsir hér --- eru teknar til hliðar er kominn halli á fjárlögin. Fjármunamyndun út úr rekstri ríkissjóðs á árinu 2001 verður neikvæð upp á eina 2--3 milljarða þannig að allur afgangurinn verður fenginn með sölu eigna ef hún kemur til. Sala eigna er auðvitað allt annar hlutur en rekstur ríkissjóðs. (Forsrh.: ... árið 2002?) Nei, ég er að tala um árið 2001 og svo skal ég koma að næstu fjárlögum. Menn geta selt eignir á meðan þeir eiga þær eða losað þær við sig. En hvað ætla þeir svo að gera?
Varðandi forsendur fjárlagafrv. fyrir árið 2002 vita allir að þær eru mjög veikar. Á tímum niðursveiflu í hagkerfinu hafa menn tilhneigingu til að ofmeta tekjurnar. Það sýnir m.a. reynslan frá yfirstandandi ári og það mun hún líka sýna á næsta ári þannig að þetta er allt á mjög veikum grunni byggt.