Kristján L. Möller (andsvar):
Herra forseti. Ég hlustaði með athygli á hv. þm. Gunnar Birgisson ræða um skattamál. Ég minnist þess ekki að ég hafi átt möguleika á því að ræða við hann áður um þetta mál.
Nú er hv. þm. er jafnframt formaður bæjarráðs Kópavogs, einn af fáum sveitarstjórnarmönnum sem situr hér á hinu háa Alþingi. Það hefur líka komið fram að tryggingagjaldið, hækkun á tryggingagjaldi sem á að verða 1. jan. 2003, muni íþynjga mjög sveitarfélögunum. Þess vegna vil ég spyrja hv. þm., formann bæjarráðs Kópavogs, hvort hann sé ánægður með þá auknu skatta sem lagðir eru á íbúa Kópavogs í þessu frv. Það kemur fram að íbúar Kópavogs muni þurfa að greiða um 17 millj. kr. meira í tryggingajald eftir þessa breytingu en nú er, sveitarfélög í Reykjanesi tæpar 73 millj. kr. og höfuðborgin alls 180 millj. kr.
Er hv. þm. Gunnar Birgisson, formaður bæjarráðs Kópavogs, ánægður með þessa skattahækkun á íbúa Kópavogs?