Forseti (Halldór Blöndal):
Ég þakka hæstv. forsrh. góðar óskir í garð okkar þingmanna og starfsmanna Alþingis. Ég óska alþingismönnum og starfsmönnum Alþingis gleðilegs árs. Jafnframt sendi ég landsmönnum öllum mínar bestu nýársóskir.
Ég vona að hlé það sem verið hefur á reglulegum fundum Alþingis hafi nýst alþingismönnum vel til fundahalda í kjördæmum og til annarra samskipta við kjósendur.
Fyrir höndum er nú stutt þinghald þar sem kosningar til Alþingis verða í maí. Samkvæmt starfsáætlun lýkur þingstörfum 14. mars, eftir tæpar átta vikur. Ég vænti þess fastlega að við þá áætlun verði staðið og að afgreiðsla mála og umræður taki mið af því.