[prenta uppsett í dálka] 73. fundur, 128. lþ.
Iðnaðarráðherra (Valgerður Sverrisdóttir):
Hæstv. forseti. Ég tek undir það með hæstv. samgrh. að mjög margt athyglisvert kemur fram í þessari skýrslu. Eins og komið hefur fram var hún rædd í ríkisstjórn á föstudaginn var og þar varð niðurstaðan að Byggðastofnun fengi ákveðið hlutverk við frekari vinnslu og tillögugerð.
Ég hef þegar skrifað Byggðastofnun bréf og farið fram á það við stofnunina að hún fari í fyrsta lagi yfir skýrsluna og þær tillögur sem þar eru kynntar með tilliti til aðgerða í byggðamálum. Í öðru lagi hef ég farið fram á að hún meti umfang flutninga atvinnugreina sem talið er að eigi undir högg að sækja. Í þriðja lagi er mælst til að metið verði hver styrkjaþörf gæti verið.
Við erum að vinna hratt að þessu máli og fleiri skýrslugerðir eru í gangi, bæði hvað varðar búsetuskilyrði fólks og eins starfsskilyrði fyrirtækja á landsbyggðinni miðað við höfuðborgarsvæðið. Þær skýrslur eru um það bil að líta dagsins ljós þannig að að ýmsu er að hyggja. En að þessu er unnið í samræmi við byggðaáætlun.
