Jóhann Ársælsson:
Hæstv. forseti. Tíminn er nú að renna mjög hratt úr stundaglasi Sementsverksmiðjunnar og mér finnst vanta dálítið upp á það að stjórnvöld tali skýrt í málinu. Ég held að það hefði verið betra ef það hefði legið fyrir fyrr að það væri meining stjórnvalda að sjá til þess að áframhaldandi rekstur eða, til vara, áframhaldandi framboð á sementi kæmi frá þessu fyrirtæki inn í framtíðina þannig að þeir sem eru komnir inn í þessa samkeppni, inn á markaðinn vissu að þeir gætu ekki bolað þessum keppinauti út af markaðnum heldur yrðu þeir að horfast í augu við framtíð þar sem þeir væru að keppa við hann, hvort sem framleiðsla sements heldur áfram eður ekki.
Það skortir fleira á heldur en þetta vegna þess að það er alveg ljóst að ríkið mun ekki geta átt þetta fyrirtæki í framtíðinni. Það þarf að fá aðra eignaraðila að fyrirtækinu því að ríkið getur ekki staðið í samkeppnisrekstri á þeim markaði sem hér er um að ræða. Þetta er verkefni ríkisvaldsins og því hefur ekki verið sinnt.