Arnbjörg Sveinsdóttir:
Hæstv. forseti. Á Íslandi er góð reynsla af rekstri álvera. Sagan segir okkur hversu góð áhrif á efnahag landsmanna bygging og rekstur álvera á suðvesturhorninu hefur haft. Hið nýja álver í Reyðarfirði mun einnig hafa gífurlega góð áhrif á efnahagsstarfsemina.
Nú þegar er farið að gæta áhrifa fyrirhugaðra framkvæmda á styrkingu byggðarinnar á Austurlandi. Þjóðin öll mun njóta aukins hagvaxtar í bráð vegna framkvæmdanna, og í lengd vegna þess hversu mjög íslenska hagkerfið styrkist vegna aukins útflutnings.
Hæstv. forseti. Þegar hér á Alþingi eru greidd atkvæði um álver í Reyðarfirði er það gert með gleði og vissu um góð áhrif á hag Austfirðinga og góð áhrif á hag Íslendinga, og ég segi já.