[prenta uppsett í dálka] 86. fundur, 128. lþ.
Þuríður Backman:
Herra forseti. Stóriðjustefna ríkisstjórnarinnar birtist í þessu frv. í allri sinni verstu mynd. Til að styrkja byggð á Austurlandi á að reisa svo stórt álver að það mun hafa gífurleg áhrif á þróun byggðarinnar í beinni andstöðu við sjálfbært samfélag og fjölbreytt atvinnulíf. Við höfum aðra möguleika til að styrkja byggð, efla atvinnu og viðhalda áframhaldandi hagsæld í landinu. Umhverfisáhrif Kárahnjúkavirkjunar verða gífurleg og óafturkræf. Við höfum undirgengist Ríó-sáttmálann og sjálfbæra þróun, og þessar stóriðjuframkvæmdir ganga í berhögg við skuldbindingar okkar. Því greiði ég atkvæði gegn þessari heimild.
