Steingrímur J. Sigfússon:
Herra forseti. Það er enn hægt að sjá að sér í þessu máli. Það er enn hægt að komast hjá mesta umhverfisslysi Íslandssögunnar og einu mesta efnahagsslysi sem í uppsiglingu er með byggingu Kárahnjúkavirkjunar og álvers í Reyðarfirði.
Stærð þessa máls er slík, herra forseti, og hin miklu óafturkræfu áhrif þess á náttúru landsins að enginn nema þjóðin hefur siðferðilegan rétt til að taka svona ákvörðun. Þjóðin á landið, ekki fáeinir misvitrir stjórnmálamenn. Það er auðvelt að koma því við samhliða alþingiskosningum í vor að þjóðin verði æðsti dómari í þessu máli og það hlutverk getur enginn annar tekið að sér. Ég segi já.