[prenta uppsett í dálka] 100. fundur, 128. lþ.
Frsm. sjútvn. (Árni R. Árnason) (andsvar):
Herra forseti. Mér finnst rétt að fram komi það sjónarmið mitt að mér þykir sú ræða sem flutt var dálítið sérkennileg í ljósi þingmálsins sem er til umræðu. Það fjallar um örlítið brot löggjafarinnar um stjórn fiskveiða. Það fjallar ekki um eignarhald þjóðarinnar á auðlindinni, það fjallar ekki um auðlindagjald. Það fjallar einungis um það sem við höfum í daglegu tali kallað Hafró-aflann, þ.e. það litla brot afla fiskiskipa sem skipstjórnarmönnum er heimilt að ákveða að teljist ekki til aflaheimilda skipsins.
Vegna þess sem fram kom verð ég að viðurkenna að fyrir einhverri stundu síðan sat ég þar sem hv. þm. Rannveig Guðmundsdóttir kýs að kalla hliðarherbergi en er nú venjulega kallaður Skáli, bæði af starfsmönnum og flestum hv. þm. En svo vildi til að hæstv. forsrh. sat við það borð stundu fyrr og hann hafði farið þaðan eftir því sem ég best vissi úr húsinu áður en þetta mál kom til umræðu. Ég sé ekki það samhengi sem hv. þm. setti fram.
Mér þótti hins vegar svolítið merkilegt fyrir fáeinum dögum, ef við höldum áfram svona umræðu sem tengist ekki málinu, þá hélt því fram einn hv. þm. úr ræðustól, og ekki er hann þingmaður Samfylkingarinnar, að hann hefði átt upphafið að skipan auðlindanefndarinnar. Ég hef aldrei heyrt því mótmælt. En ég verð líka að viðurkenna að mér þótti samt sem áður það ekki mjög sennilegt.
Staðreyndin er náttúrlega sú, við þekkjum það öll, herra forseti, að skipan þeirrar nefndar var ákveðin í kjölfar þáltill. sem flutt var í hv. Alþingi og um skipan hennar varð sátt milli bæði stjórnar og stjórnarandstöðu. Framhaldið var unnið til þess að ná sátt um það mál.
