[prenta uppsett í dálka] 102. fundur, 128. lþ.
Kristján L. Möller (andsvar):
Hæstv. forseti. Það kann að vera að ýmislegt hafi gleymst hérna daginn eftir að við vorum að ræða þetta, en hv. þm. nefndi það orð sem ég notaði, jú það er rétt, ,,árásarfrumvarp``. Hann gerði að umtalsefni gagnrýni mína á breytingu á rekstrarþáttum heilsugæslustöðva og sjúkrahúsa, þ.e. að leggja niður stjórnir sjúkrahúsa og heilsugæslustöðva eins og hæstv. heilbrrh. var að gera. Ég var mjög andvígur því og ég las hér upp margar umsagnir. Síðan hefur komið í ljós eftir það að fleiri umsagnir frá sjúkrahúsum og heilsugæslustöðvum á landsbyggðinni hefðu átt að vera komnar inn miðað við hvað þessu ráðslagi var mótmælt. Ég las upp úr ágætri umsögn frá Akureyri, þar sem þetta var kallað miðstýring þar sem verið væri að draga störf suður og ég er enn þá á því að svo sé.
Ég sagði hins vegar, og það var kannski eins og með þetta, að fyrstu og upphaflegu hugmyndir hæstv. ráðherra voru um algjöran niðurskurð á öllu og ekkert í staðinn. Í meðförum heilbrn. varð til þetta framkvæmdastjórnarbatterí eða það styrkt og það var skömminni skárra en það sem var í byrjun.
Ég er hins vegar enn á þeirri skoðun að það hefði verið betra að halda þessum stjórnum, eins og ég lagði til, en gera þó þær breytingar að ráðherra skipaði þrjá í staðinn fyrir sveitarfélögin og þetta væru pólitískir fulltrúar, umsjónarmenn, trúnaðarmenn viðkomandi heilbrrh. á kjörtímabili ráðherra sem sæju um rekstur og það sem þyrfti að gera á þessum stöðvum.
Ég er enn þá á þeirri skoðun, herra forseti, að það sem gert var hafi verið misráðið. En því miður, þessi lög hafa þegar tekið gildi.
(Forseti (GuðjG): Forseti minnir á að hér er verið að ræða hafnalög.)
