[prenta uppsett í dálka] 102. fundur, 128. lþ.
Kristján L. Möller (andsvar):
Hæstv. forseti. Í seinna andsvari hv. þm. kom fram mikill misskilningur. Hann segir að ekki sé eðlilegt að meiri hluti stjórnar sé skipaður af þeim sem beri ekki ábyrgð og leggi ekki til rekstrarins. Ég er alveg sammála þessu, hv. þm. Þetta var það sem lagt var til í brtt. minni og ég hefði viljað leiðrétta þann misskilning, kveðið var skýrt á um það. Þess vegna var það í brtt. minni að ráðherra mundi skipa þrjá, sveitarstjórn einn og starfsmenn einn.
Ég er sammála því sem hv. þm. sagði og um það var brtt. mín, að sá sem ber litla ábyrgð á rekstrinum á ekki að skipa meiri hluta stjórnar. En ég vil hafa það alveg á hreinu að hv. þm. hefur þá misskilið þá tillögu viljandi eða óviljandi, en svona var nú þetta.
Hitt atriðið, sem ég tel nú vera útúrsnúning, um það að ég telji ekki að þriggja manna framkvæmdastjórn sé ekki skipuð heimamönnum, það hef ég aldrei sagt. Ég sagði að þetta væri skömminni skárra en hitt hefði verið betra. Og ef eitthvað er þá hef ég styrkst í þeirri trú að sú tillaga sem ég lagði fram var betri en sú lending sem náðist, þ.e. sú málamiðlun sem gerð var til lausnar á málinu.
