[prenta uppsett í dálka] 3. fundur, 128. lþ.
Ásta R. Jóhannesdóttir:
Herra forseti. Undanfarið hafa borist úr ýmsum áttum alvarlegar vísbendingar um aðbúnað og líðan fjölda barna og ungmenna. Nýlegar kannanir benda til að kynferðisleg misnotkun á börnum sé meiri hér en áður var talið. Fleiri falla fyrir eigin hendi en í umferðarslysum og sjálfsvígstilraunum ungmenna fer fjölgandi. Brottfall er meira úr framhaldsskólum en í nágrannalöndum okkar og einelti er viðvarandi vandi. Við þessu verður að bregðast.
Niðurstöður nýlegrar rannsóknar á kynferðislegri misnotkun á börnum hér á landi eru ískyggilegur vitnisburður um þjóðfélagsmein sem uppræta verður með öllum tiltækum ráðum. Á hverju ári er sálarheill og hamingju fjölda ungmenna stefnt í voða vegna misnotkunar sem oftar en ekki liggur í þagnargildi. Það er skylda stjórnvalda að bregðast við þessum niðurstöðum með ábyrgum hætti og fagna ég áhuga félmrh. á því.
Alþingi hefur samþykkt að mótuð skuli heildarstefna í málefnum barna og unglinga. Þeirri vinnu verður að hraða. En stefnumótun dugar þó skammt ef foreldrum er ekki gert kleift að veita börnum sínum viðunandi aðbúnað og viðurværi. Góð lífsskilyrði í uppvexti er mikilvægur þáttur fyrir líðan barns. Það er óþolandi og okkar velferðarsamfélagi til vansa að foreldrar skuli þurfa að bíða í röðum eftir aðstoð líknarfélaga og hjálparstofnana til að geta búið börn sín skammlaust í skólann. Bág kjör fjölda barnafólks, einstæðra foreldra og ekki síst öryrkja og barna þeirra er stór hluti vandans. Á honum verða stjórnvöld að taka þegar í stað.
