![](http://www.althingi.is/myndir/althlit.gif)
Karl V. Matthíasson (andsvar):
Herra forseti. Segjum að fram á sviðið á Grenivík komi ungur maður sem vill stunda sjó, getur hann þá samkvæmt þessu haft greiða leið að kvótanum á Grenivík? Gott væri ef kerfið virkaði þannig. En þegar farið er að binda kvótann algerlega niður með handvirkri úthlutun, eins og hlýtur að vera í slíku kerfi, er deginum ljósara að upp koma illindi og deilur í tengslum við slíkar úthlutanir.
Hvað hefur gerst með fiskmarkaðina í landinu? Fyrst var þeim kröftuglega mótmælt og sagt að þeir ríkustu mundu bara ná að kaupa heimildir. Við verðum hins vegar líka að treysta hæfni og færni þeirra sem standa í útgerð. Það eru ekki endilega bara þeir ríkustu sem fá heldur þeir sem eru góðir í útgerð og standa sig vel.