![](http://www.althingi.is/myndir/althlit.gif)
Hjálmar Árnason (andsvar):
Herra forseti. Ég ítreka það sem ég nefndi áðan að umræða um kosti og galla núverandi fiskveiðistjórnkerfis og um fiskveiðistjórnkerfi almennt hefur oft farið hér fram og hún á eftir að fara fram. Það sem ég er að reyna að draga fram og tel skipta miklu máli --- menn mega nú ekki vera svo svartsýnir í tilverunni að þeir sjái þó ekki ljósið --- er að ég tel einfaldlega að áframeldi á þorski sé kjarninn í þessu litla frv. og það er það sem ég vildi draga fram.
Ég ítreka það sem ég sagði áðan að áframeldi á þorski getur skapað gífurlega jákvæð sóknarfæri fyrir sjávarplássin í landinu. Ég deili áhyggjum af stöðu einstakra sjávarplássa með hv. þm. Sú umræða hefur farið hér fram og hún mun halda áfram hér í vetur. Þetta frv. tekur ekki á þeim vanda.
Ég segi það enn og aftur að ég fagna því að hér skuli verið að styðja við eina af þremur stoðum í þorskeldi á Íslandi, vaxandi og vonandi mjög jákvæðri atvinnugrein fyrir okkur.