![](http://www.althingi.is/myndir/althlit.gif)
Iðnaðarráðherra (Valgerður Sverrisdóttir):
Hæstv. forseti. Hv. þm. Árni Steinar Jóhannsson hefur lagt fram fyrirspurn til mín og fyrsta spurningin er þessi:
,,Hver hefur þróun gjaldtaxta verið frá því að ríkið tók við rekstri Orkubús Vestfjarða:
a. taxta einstaklinga,
b. taxta iðnfyrirtækja?``
Orkubú Vestfjarða varð að hlutafélagi 1. júlí 2001 og í apríl 2002 var fyrirtækið að fullu komið í eigu íslenska ríkisins. Orkubú Vestfjarða hf. er sjálfstætt fyrirtæki og yfir því er stjórn sem eigandi þess kaus á aðalfundi 3. maí sl. Gjaldskrár Orkubús Vestfjarða hækkuðu um 4,9% frá 1. júlí 2001 og um 3% frá 1. ágúst sl. Þessar hækkanir eru ívið minni en almennar verðlagshækkanir og hliðstæðar hækkanir annarra orkufyrirtækja. Hækkanir þessar náðu jafnt til heimila og fyrirtækja.
Og önnur spurningin er:
,,Hvaða áætlanir eða áform eru uppi hjá Orkubúi Vestfjarða um þróun gjaldskrár á þessu ári og næstu tveimur árum, 2002--2004:
a. gjaldskrár einstaklinga,
b. gjaldskrár iðnfyrirtækja?``
Ekki eru uppi áform um hækkun gjaldskráa Orkubús Vestfjarða umfram verðlagshækkanir á næstu árum en það er á valdi stjórnar fyrirtækisins að taka slíkar ákvarðanir.