[prenta uppsett í dálka] 44. fundur, 128. lþ.
Umhverfisráðherra (Siv Friðleifsdóttir) (andsvar):
Virðulegi forseti. Eins og ég rakti áðan í inngangsorðum mínum varðandi þetta frv. er um að ræða aðgerðir til að draga úr veiðum á rjúpu. Við fengum tillögur frá Náttúrufræðistofnun Íslands um ýmsar aðgerðir, höfum skoðað þær með hagsmunaaðilum og komumst að því að ein ágæt leið í þessu sambandi væri að banna sölu á rjúpum til þess að hindra magnveiðimennina. 10% veiðimanna veiða helming veiddra rjúpna þannig að almennt talið er það æskilegt, að mínu mati, að takmarka veiðarnar, m.a. með því að banna sölu á rjúpum til veitingastaða og í búðir. Þetta hefur m.a. verið gert í Bretlandi og í Bandaríkjunum með ágætisárangri þannig að ég tel að við Íslendingar getum líka gripið til þessara aðgerða, vonandi með sama ágæta árangri. Hér er um lagaheimild að ræða sem gilda mun í fimm ár, verði hún samþykkt, en við vonum að þessar heildstæðu tillögur sem hér eru fluttar um að takmarka rjúpnaveiðarnar muni hafa borið árangur á þessu tímabili. Þá falla lögin eðlilega úr gildi að því afloknu.
