Frsm. meiri hluta efh.- og viðskn. (Vilhjálmur Egilsson) (andsvar):
Virðulegi forseti. Ég er sammála hv. þm. um að við þurfum að haga okkar skattkerfi þannig að það sé í einhverju samhengi við það sem er í kringum okkur og öll eru skattkerfin í samkeppni hvert við annað með einum eða öðrum hætti. Við getum ekki verið með mjög mismunandi hlutfall beinna eða óbeinna skatta í samanburði við helstu nágrannalönd okkar.
Það sem ég vildi vekja sérstaka athygli á líka er að þær skattbreytingar sem orðið hafa varðandi fyrirtækin hafa skilað sér býsna vel. Ég vek athygli á því að við lokameðferð fjárlagafrv. í þinginu kom fram að tekjuskattur á fyrirtæki hefur skilað 3 milljörðum meira í tekjur fyrir ríkissjóð á þessu ári en menn höfðu reiknað með. Sú tala flyst yfir á næsta ár og þegar upp er staðið virðist sem allar þær skattbreytingar sem menn hafa verið að gera á atvinnulífinu komi til með að skila ríkissjóði hærri tekjum.
Einn skatt höfum við verið að taka upp á undanförnum árum sem var ekki hér áður og skiptir máli í þessum samanburði, þ.e. fjármagnstekjuskattinn. Þegar hann var tekinn upp kom hann inn að verulegu leyti sem skattur á tekjur einstaklinga. Það hefur að sjálfsögðu mikla þýðingu í öllum þessum samanburði.