[24:22]

Frsm. félmn. (Arnbjörg Sveinsdóttir) (andsvar):

Hæstv. forseti. Ég tek undir það að kannski hefði mátt orða þetta skýrar eða láta þetta koma betur fram í grg. eða nál.

En það er annað sem ég vildi aðeins bregðast við út af ræðu hv. þm. og það er varðandi afstöðu Akureyrarbæjar. Okkur var auðvitað ljóst að ekki var ánægja hjá Akureyrarbæ varðandi þessar breytingar. Í umsögn Sambands íslenskra sveitarfélaga kom fram að Kristján Þór Júlíusson, sem er stjórnarmaður í sambandinu, taldi að þær breytingar sem væri verið að gera gengju allt of skammt og gerði um það bókun. Þess vegna ákvað nefndin að kalla Kristján Þór Júlíusson til fundar við nefndina og hann gerði þar grein fyrir þeim sjónarmiðum sínum að honum fyndust þessar breytingar ganga allt of skammt, sérstaklega gagnvart svo stóru sveitarfélagi sem Akureyrarbær er.

En síðan barst nefndarmönnum í félmn. bréf, sem hann var reyndar búinn að boða, og það voru mótmæli gagnvart breytingunum á stofnkostnaði varðandi sjúkrahúsin. Hann gerði mjög vel grein fyrir því og vísaði m.a. til samkomulags ríkis og Reykjavíkurborgar og ég reikna auðvitað með því að fjmrn. og félmrn. muni fara í þá vinnu með Akureyrarbæ að meta það hvernig staðan er gagnvart Fjórðungssjúkrahúsinu á Akureyri. Ég veit og trúi því að það hafi ekki verið meiningin að hlunnfara Akureyrarbæ vegna Fjórðungssjúkrahússins og reikna með því að Kristján Þór Júlíusson muni sækja þetta mál og fara yfir það með ráðuneytunum.