[prenta uppsett í dálka] 56. fundur, 128. lþ.
Steingrímur J. Sigfússon (andsvar):
Herra forseti. Í fyrsta lagi verð ég að segja að mér leiðist að heyra hæstv. félmrh. sarga enn og aftur á Raufarhöfn og fyrrverandi sveitarstjórn þar. Hæstv. ráðherra gerði það m.a. á fjármálaráðstefnu sveitarfélaga. Mér finnst ekki sanngjarnt að taka eitt sveitarfélag og tiltekna einstaklinga þar og nota með þeim hætti sem hæstv. ráðherra gerði á þeirri ráðstefnu og aftur héðan úr ræðustóli. Það má segja ýmislegt um stjórnsýsluna þarna. Ég er ekki að segja að menn hafi ekki gert mistök þar en við skulum heldur ekki horfa fram hjá því að um lítið sveitarfélag er að ræða sem varð fyrir miklum ytri áföllum við afar erfiðar aðstæður. Viðleitni manna til að renna stoðum undir annað atvinnulíf o.s.frv. varð sveitarfélaginu dýr. Það er auðvelt að setjast í dómarasætið hér suður við Austurvöll og hafa hörð orð uppi en það er erfiðara að heyja þá varnarbaráttu sem Raufarhöfn og mörg önnur sambærileg pláss hafa staðið í og haft harla lítinn og léttvægan stuðning opinberra aðila. Hann hefur a.m.k. ekki birst í sjávarútvegsstefnunni eða samgöngubótum á viðkomandi svæði eða öðrum slíkum hlutum.
Í öðru lagi, um jöfnunarsjóðinn og stöðu sveitarfélaga á landsbyggðinni, er að sönnu rétt að eðlilega rennur drjúgur hluti tekjuöflunarframlaganna og upphæðanna þangað enda hallar á í tekjum þar. Eitt sveitarfélag á landsbyggðinni hefur þó mikla sérstöðu í þessum efnum og það er Akureyri. Flokkunin og skiptingin gerir það að verkum að í raun kemur Akureyri illa út úr þessu kerfi og endar sem eitt af tekjulægstu sveitarfélögum landsins að teknu tilliti til jöfnunarsjóðsgreiðslnanna. Akureyri geldur þess að lenda í þeim stærðarflokki sem hún lendir.
Varðandi uppgjörið og deilurnar um 4 milljarða, þ.e. um 5,1 milljarða sem hæstv. ráðherra segir að hafi runnið frá ríkinu til sveitarfélaganna og telur þá með upphæðirnar í þessu frv. sem er auðvitað fráleitt. Hér er eingöngu verið að mæta nýjum útgjöldum sveitarfélaganna vegna húsleigubóta eða beinlínis skertra tekna vegna nýlegra lagabreytinga í sambandi við fasteignagjöld. Þetta er auðvitað ekki sanngjörn stærðfræði hjá hæstv. ráðherra.
