Kristinn H. Gunnarsson:
Herra forseti. Hæstv. heilbrrh. hefur gert hér grein fyrir stöðu mála og því að ráðuneytið ásamt Heilbrigðisstofnuninni í Ísafjarðarbæ leggur sig fram um að leysa úr þessu máli, þeim vanda sem skapast vegna þess að læknirinn er í námsleyfi. Um tímabundið ástand er því að ræða hvað það varðar, og hitt að erfiðlega hefur gengið að fá fastráðinn hjúkrunarfræðing á staðnum eins og hugur manna stendur til og á að vera.
Þetta auðvitað vekur athygli á því ástandi sem almennt er uppi í þjóðfélaginu. Það er verulegur skortur á hjúkrunarfræðingum hér á landi og reyndar nokkur skortur á læknum líka. Því eiga heilbrigðis- og menntamálayfirvöld að kappkosta að fá sem flesta til náms í þessum greinum, sérstaklega hjúkrunarfræði, til að mæta þeim skorti sem er fyrir hendi á þessu sviði. Úrlausn á þessu máli liggur að stærstum hluta til í atbeina menntamálayfirvalda hvað það varðar.