![](http://www.althingi.is/myndir/althlit.gif)
Björgvin G. Sigurðsson:
Ágæti forseti. Það verður ekki of oft tekið fram að hlutur sauðfjárbænda í samfélaginu er með því versta og raunalegasta sem þekkist í auðugum nútímasamfélögum Vesturlanda. Til marks um ástandið í greininni má nefna þá uppgjöf sem fram kom í máli hæstv. iðn.- og viðskrh. og sauðfjárbónda, Valgerðar Sverrisdóttur. Sú afstaða kom fram í því sem hv. þm. Jóhann Ársælsson, fyrirspyrjandi, las upp áðan.
Í ljósi þeirrar hörmulegu stöðu sem uppi er er mikilvægast að hæstv. landbrh. svari skýrt og komi með sterk skilaboð til þeirra sauðfjárbænda sem berjast í bökkum í þröngri og ömurlegri stöðu hvort til greina komi að auka frelsi í greininni og aflétta útflutningsskyldunni af bændum.