Rannveig Guðmundsdóttir:
Virðulegi forseti. Það er greinilegt að ég og hæstv. utanrrh. erum að tala í kross. Ég er ekki að tala um varnarþarfir Bandaríkjanna að öðru leyti en að þær spila svo stórt hlutverk í því hvaða samningar verða á milli okkar og þeirra í framtíðinni ef við viljum gera samninga við þau. Það eru viðræður í gangi og út frá þeim viðræðum yrði slík ákvörðun tekin.
Það er greinilegt að pólitískur stuðningur Íslands hefur ekki dugað til að halda óbreyttri stöðu gagnvart Bandaríkjunum. Ég bendi á það. Maður verður að vita hver staðan er til að geta horft fram á veginn. Ísland hefur greinilega mjög litla þýðingu fyrir varnarstefnu Bandaríkjanna.
Hæstv. utanrrh. nefndi að loftvarnir væru aðalatriðið hjá okkur. Já, en þessar þotur og loftvarnirnar sem þeim fylgja hanga á eftirlitsvélunum sem Bandaríkjaher hefur viljað hafa hér. Það eru miklar breytingar í farvatninu og við fáum ekki einu sinni áframhald viðræðna um varnarsamstarfið.