Anna Kristín Gunnarsdóttir:
Frú forseti. Í umræðum um frv. til laga um yrkisrétt í gær voru ýmsar spurningar lagðar fyrir hæstv. landbrh., bæði varðandi form og efni frv., m.a. um hugsanleg áhrif þess á garðyrkjubændur. Hæstv. ráðherra svaraði í engu spurningum varðandi efni frv. né áhrif þess. Greinilegt var að ráðherrann skildi ekki einstakar greinar frv. Það hlýtur þó að vera lágmarkskrafa til ráðherra sem ber ábyrgð á málaflokki að hann sé viðræðuhæfur um frumvörp sem hann flytur á þinginu.
Ég velti fyrir mér hvort ég ætti að leggja til að frv. yrði vísað aftur til ráðherra eða sitja hjá við afgreiðslu frv. En í trausti þess að hægt verði að vinna bót á frv. í landbn. munu ég og samflokksmenn mínir greiða því atkvæði að það gangi til nefndar.