[prenta uppsett í dálka] 78. fundur, 130. lþ.
Fjármálaráðherra (Geir H. Haarde) (andsvar):
Herra forseti. Þetta frv. er framlenging á tilteknum lagaákvæðum sem verið hafa í gildi undanfarin ár til að hlúa hér að vaxtarbroddi í sambandi við orkunotkun og minnkandi mengun.
Vetnisfarartæki eru ekki svo langt á veg komin að það sé í rauninni á dagskrá að slík farartæki komi á götuna alveg á næstunni sem fólksbílar. Hins vegar hefur verið hlúð, ég vil segja með myndarlegum hætti, að starfsemi Íslenskrar nýorku og þeirra aðila sem hér hafa verið með sérstakt tilraunaverkefni í gangi hvað varðar vetnisstrætisvagna af hálfu hins opinbera.
Hitt er annað mál að ég tel að móta þurfi heildarstefnu gagnvart öllum þessum þáttum á næstunni. Þetta bráðabirgðaákvæði sem gildir til ársloka 2006 gefur þangað til svigrúm til að móta slíka stefnu, og áður en þetta ákvæði til bráðabirgða fellur úr gildi.
