[prenta uppsett í dálka] 85. fundur, 130. lþ.
Umhverfisráðherra (Siv Friðleifsdóttir):
Hæstv. forseti. Í fyrsta lagi er spurt:
,,Hvað líður verndaráætlunum í tengslum við Ramsar-samþykktina fyrir
a. Mývatn og Laxá,
b. Þjórsárver,
c. Grunnafjörð?
2. Hvenær eru áætluð verklok við gerð verndaráætlana fyrir þessi svæði?``
Því er til að svara að Umhverfisstofnun fer með umsjón og stjórn þeirra þriggja svæða sem Ísland hefur tilkynnt á skrá Ramsarsamningsins. Stofnunin hefur þegar hafið undirbúning að gerð verndaráætlunar fyrir Mývatns- og Laxársvæðið og miðað við það fé sem stofnunin hefur til verkefnisins og stöðu rannsókna á svæðinu er útlit fyrir að stofnunin ljúki gerð verndaráætlunarinnar á þessu ári og áætlunin verði tilbúin á næsta ári.
Vinna við gerð verndaráætlunar fyrir Þjórsárver er þegar hafin. Umhverfisstofnun telur ekki þörf á frekari rannsóknum vegna þeirrar vinnu og gerir stofnunin ráð fyrir að ljúka gerð verndaráætlunar fyrir svæðið á þessu ári.
Gerð verndaráætlunar fyrir Grunnafjörð er ekki hafin en Umhverfisstofnun gerir ráð fyrir að ljúka gerð hennar innan þriggja ára. Að mati stofnunarinnar er ekkert sem ógnar svæðinu í dag en stofnunin telur þörf á frekari rannsóknum á svæðinu.
