[prenta uppsett í dálka] 98. fundur, 130. lþ.
Umhverfisráðherra (Siv Friðleifsdóttir) (andsvar):
Virðulegur forseti. Varðandi grunnþjónustuna finnst mér hún vera ágætlega skilgreind í frv. Það kemur mjög skýrt fram að grunnþjónustan verður greidd af ríkinu þannig að ég deili ekki áhyggjum hv. þm.
Varðandi hlýnun lofthjúpsins aflar Veðurstofan upplýsinga á því sviði með mælingum sínum. Þær eru mikilvægar og þeim verður haldið áfram þannig að þau gögn verða áfram aðgengileg eins og áður. Sérfræðingar Veðurstofunnar hafa unnið mjög gott starf á þessum vettvangi og hafa líka verið með okkur í nefndum þar sem við skoðum t.d. alþjóðaskýrslurnar sem hafa snúist um loftslagsbreytingar, IPCC-skýrslurnar svokölluðu, sem skipta mjög miklu máli. Sérfræðingar Veðurstofunnar hafa verið með okkur í nefndum og ráðlagt okkur í þeim málum þannig að því verður að sjálfsögðu haldið áfram.
