Mörður Árnason (andsvar):
Herra forseti. Mig langar að minnast á þetta orð ,,sæfiefni`` sem ég sá fyrst fyrir nokkrum missirum og er hrifinn af. Fyrri hlutinn er myndaður af sama stofni og sögnin ,,að sofa`` og orðin ,,svefn`` og ,,að svæfa``.
Ég man eftir því þegar ég sá þetta afbrigði stofnsins eða þennan stofn af sömu rótinni. Það er í vísu Egils Skalla-Grímssonar þegar hann er búinn með einhverja orrustuna. Ég man ekki hverja en svo er veisla og þar situr þetta mikla kvendi og segir við Egil: ,,Hvað skaltu, sveinn, í sess minn?`` Egill svarar með vísu um afrek sín og þar á meðal segir hann:,, ... létum blóðga búka í borghliðum sæfask.`` Þetta kemur mér alltaf í hug þegar minnst er á þessi sæfiefni, sem sagt þegar Egill berst við menn í borghliðunum þannig að þetta eru ekki slæm hugrenningatengsl.