Drífa Hjartardóttir:
Virðulegi forseti. Ég tel að grænar greiðslur geti aldrei leyst af hólmi framleiðslutengdan stuðning við landbúnað heldur verði það að vera einhvers konar viðbót. Í raun eru grænar greiðslur úreldingarstyrkir þegar til lengdar lætur og eins og kom fram áðan í umræðunni eru samningarnir sem við höfum mjög gegnsæir. Núna hefur Evrópusambandið breytt stefnu sinni varðandi mjólkurframleiðsluna og hefur aukið framleiðslutengdan stuðning.
Mig langar aðeins að geta þess að í Bændablaðinu er mjög athyglisverð grein um viðhorf norsku bændasamtakanna til alþjóðasamninga um búvöruviðskipti. Þau telja að aðild að Evrópusambandinu yrði enn þá örlagaríkari fyrir norska bændur heldur en nýr WTO-samningur sem þeir telja þó að muni hafa mjög mikil og skaðleg áhrif á norskan landbúnað, að þar muni draga allverulega úr framleiðslunni sem mun aðeins verða að framleiða mjólk og grænmeti.