Pétur H. Blöndal (andsvar):
Frú forseti. Þó hv. þingmenn Samfylkingarinnar hafi bent á að samkeppnislög dygðu ekki í sinni tillögu þá treysti ég nú skýrsluhöfundi betur. Það er nú einu sinni þannig með mig.
Varðandi Ríkisútvarpið þá er ég bara ekki á sama máli og skýrsluhöfundar. Ég tel varðandi einokun þá sem ríkið hefur haft á fjölmiðlun um áratugi að ríkið eigi ekkert erindi inn á þetta svið, fjölmiðlun. Þarna geta einstaklingar og starfsmenn Ríkisútvarpsins staðið sig alveg jafn vel þó Ríkisútvarpið væri ekki í eigu ríkisins.