Jóhann Ársælsson (andsvar):
Hæstv. forseti. Ég sé ástæðu til þess að spyrja: Hvernig sér hæstv. forsrh. fyrir sér fjármögnun fjölmiðlafyrirtækis eftir að lögin taka gildi? Fyrirtækjahópar, t.d. bankar, geta verið markaðsráðandi samkvæmt skilgreiningu Samkeppnisstofnunar. Sameiginlega hafa þeir markaðsráðandi stöðu vegna tengsla í gegnum kortafyrirtæki og Reiknistofnun. Þeir gætu, bæði vegna ákvæðisins um markaðsráðandi stöðu og vegna þess að ekkert fyrirtæki má eiga meira en 25% í fjölmiðlafyrirtæki, ekki tekið veð í hlutabréfum fjölmiðlafyrirtækis vegna þess að þeir mættu ekki eiga í fyrirtækinu.
Þýðir þetta ekki að engin lán er að hafa fyrir slík fyrirtæki á markaðnum? Ekkert lán. Hverjir gætu þá tekið við fyrirtækinu Norðurljósum? Hvernig sér hæstv. forsrh. fyrir sér eignarskipti á fyrirtækjum af þessu tagi ef þau komast í þrot?