Mörður Árnason (andsvar):
Forseti. Ég verð að viðurkenna að ég er engu nær en hv. þm. Sigurjón Þórðarson um hver rökin að baki afstöðu hæstv. heilbrrh. eru í málinu nema þau að hann er hér eins og heillum horfinn, sá ágæti maður, einhvers staðar aftarlega í þeirri lest sem nú hefur verið hnýtt saman frá tagli til kjafts og gengur á eftir hæstv. forsrh. í þinginu. En ég vil spyrja hann nákvæmlega út í frv. sem hann styður af einhverjum ástæðum. Hvernig líst honum, sem gömlum ritstjóra, á það inngrip í prentfrelsið sem felst í því að sett eru sérstök takmörk við eignarhaldi í dagblöðum, þau að það ekki megi fara saman við eignarhald í ljósvakanum? Hvernig finnst honum það og hvernig rökstyður hann sjálfur í stuttu máli það ákvæði í frv. hæstv. forsrh.?