Heilbrigðisráðherra (Jón Kristjánsson) (andsvar):
Herra forseti. Ég tel það algera oftúlkun að hér sé um frelsisskerðingu að ræða. Hér er ekki verið að skerða málfrelsi. Hér er ekki verið að leggja hömlur á skoðanaskipti í landinu. Hér er verið að sporna við samþjöppun í eignarhaldi á fjölmiðlum sem á að vera til að tryggja fjölbreytni í fjölmiðlun í landinu. Ég tel því að þarna sé um oftúlkun að ræða. Auðvitað munum við innan Framsfl. ræða málin af fullri hreinskilni og skiptast á skoðunum um þau og ég veit að þá leiðréttist þessi misskilningur, ef svo má segja, og menn fara að túlka þetta eins og efni standa til.