Halldór Blöndal (andsvar):
Herra forseti. Ég veit ekki hvort þessi hv. þm. hefur lesið það viðtal sem er við forstjóra Baugs í Viðskiptablaðinu (Gripið fram í.) 30. apríl. Hann segir einmitt hér, með leyfi forseta:
,,Ég held að það sé ekkert endilega hollt að menn eigi meiri hluta í fjölmiðlum, þ.e. fjölmiðlum sem eiga fréttastofur.``
Það kemur því alveg skýrt fram hér að forstjórinn gerir sér grein fyrir því að völd sömu samsteypunnar mega ekki verða of mikil í fjölmiðlum, sérstaklega ef þeir reka fréttastofur. Hann hefur sína mælistiku á það hvar mörkin liggi. Ég hef aðra mælistiku en hann. En hann viðurkennir að þessi hætta sé fyrir hendi. (Gripið fram í: En hvað með sama flokkinn?)