[24:07]

Magnús Þór Hafsteinsson (andsvar):

Hæstv. forseti. Ég fagna yfirlýsingu hv. þm. Kristins H. Gunnarssonar. Hún er mjög í takt við þær hugmyndir sem ég og minn flokkur höfum verið að gera okkur varðandi málið.

Stjórnarþingmenn hafa m.a. verið að reyna að haga málflutningi þannig að flokkur minn, Frjálsl., sé eins og einhver vindhani í málinu og hafa dregið inn í umræðuna að við vorum með þáltill. sem var borin fram í haust. Í þeirri þáltill. segir m.a., með leyfi forseta:

,,Alþingi ályktar að kjósa nefnd skipaða fulltrúum allra þingflokka sem fái það verkefni að kanna starfsskilyrði fjölmiðla, hræringar á fjölmiðlamarkaði og hvert stefnir og huga að því hvort þörf sé lagasetningar eða aðgerða til að treysta stöðu sjálfstæðs og fjölbreytts fjölmiðlareksturs hér á landi.``

Þar á meðal var kveðið skýrt á um að leita ætti samráðs, ekki bara á hinu háa Alþingi heldur við Blaðamannafélag Íslands og helstu fjölmiðla eða samtök þeirra.

Við höfum aldrei verið á móti því að skoða eignarhald á fjölmiðlum. Það var t.d. hv. þm. Páli Magnússyni hreinlega til vansa fyrr í kvöld hvernig hann reyndi að snúa út úr þessu og nota þetta gegn okkur (Gripið fram í.) og reyndi (Gripið fram í.) að láta líta út fyrir að málflutningurinn ... (Gripið fram í.) --- Hv. þm., ég er að tala, ég hef orðið hér. --- Það var hv. þm. hreinlega til vansa hvernig hann reyndi að snúa þessu upp á okkur, snúa málunum gjörsamlega á hvolf. Ég skal gjarnan svara honum aftur á eftir, ég hlakka til þess að takast á við hann, frú forseti.