[prenta uppsett í dálka] 108. fundur, 130. lþ.
Björgvin G. Sigurðsson (andsvar):
Virðulegi forseti. Það er einmitt kjarni málsins hjá hv. þm. Halldóri Blöndal að skýrslan bendir á ýmsar leiðir. Hún tekur ekki til neina eina leið og staðhæfir aldrei að grípa þurfi til þeirra drastísku og stórundarlegu lagasetningar sem liggur fyrir í því frv. sem við erum að ræða um og bendir sérstaklega á þessa leið ásamt mörgum öðrum leiðum. Skýrslan er því ákaflega vandað plagg að þessu leyti og tekur til ýmsar góðar leiðir sem hægt er að fara án þess að ráðist sé í það að brjóta upp fyrirtækið og kosta þar með jafnvel hundruð manna vinnuna ef vill svo illa til að fyrirtækið fari á hausinn í framhaldi af því, enda ákaflega stuttur tími gefinn í frv. sem hér um ræðir til að aðlagast breyttum reglum og lögum eins og hv. þm. Kristinn H. Gunnarsson kom inn á í sinni ágætu ræðu. Þar er um að ræða 50% fyrningu, langt umfram það sem menn hafa verið að ræða um hér í skynsamlegum tillögum um fyrningu í sjávarútvegi.
